نیشنل کانفرنس نے صوبہ جموں میں توہین رسالت اور فرقہ پرستی پر مشتمل رونما ہوئے دیگر شرانگیز واقعات کی شدید الفاظ میں مذمت کی ہے اور اس میں ملوث افراد کو کو کڑی سے کڑی سزا دینے کا مطالبہ کرتے ہوئے کہا ہے کہ کسی کو بھی پیغمبراسلام کی توہین اور ریاست میں آپسی بھائی چارے کو زک پہنچانے کی اجازت نہیں دی جانی چاہئے۔
پارٹی کے معاون جنرل سکریٹری ڈاکٹر شیخ مصطفےٰ کمال نے بھارت رکشا منچ کے اراکین کی طرف سے پیغمبر اسلام کے خلاف توہین آمیز تبصرے پر زبردست غم وغصے کا اظہار کرتے ہوئے مذکورہ فرقہ پرست شخص کے خلاف سخت سے سخت کارروائی کا مطالبہ کیا ہے۔
انہوں نے کہا کہ ایسے فرقہ پرست عناصر جموں وکشمیر میں روایتی ہم آہنگی اور بھائی چارے کو ختم کرنے پر تلے ہوئے ہیں اور عوام کو ان کے مذموم منصوبوں کو سمجھ کر آپسی بھائی چارے کو بنائے رکھنا چاہئے۔
ڈاکٹر کمال نے کہا کہ مذکورہ جماعت کے رکن کے خلاف نہ صرف سخت سے سخت کارروائی ہونی چاہئے بلکہ اس کے اقدام کے پیچھے کے مقاصد اور اصل محرکات کا بھی پتہ لگایا جانا چاہئے تاکہ ایسے کسی بھی منصوبہ کو پہلے ہی ناکام بنایا جاسکے جس کا مقصد مذہبی منافرت پھیلانا اور فرقہ وارایت کو ہوا دینا ہو۔
انہوں نے لوگوں سے اپیل کی کہ وہ امن اور بھائی چارے کو برقرار رکھیں اور قانون کو اپنا کام کرنے دیں۔ انہوں نے امید ظاہر کی ہے کہ پولیس ایسے سماج دشمن عناصر کے خلاف سخت کارروائی کرے گی۔
from Qaumi Awaz https://ift.tt/3iOHLdz
0 Comments